ఇంటింటికీ టీడీపీ: 14.60 లక్షల ఇళ్లను సందర్శించిన నేతలు.. పర్యవేక్షిస్తున్న లోకేశ్

తెలుగుదేశం పార్టీ ప్రతిష్ఠాత్మకంగా ప్రారంభించిన 'ఇంటింటికీ టీడీపీ – 2 ఏళ్ల నమ్మకం, అభివృద్ధి–సంక్షేమం' కార్యక్రమం రాష్ట్రవ్యాప్తంగా విజయవంతంగా కొనసాగుతోంది. టీడీపీ, జనసేన, బీజేపీ కూటమి ప్రభుత్వం ఏర్పడి రెండేళ్లు పూర్తయిన సందర్భంగా చేపట్టిన ఈ కార్యక్రమం ఆరో రోజుకు చేరుకుంది. గత ఆరు రోజుల్లో కూటమి శ్రేణులు రాష్ట్రవ్యాప్తంగా మొత్తం 14.60 లక్షల ఇళ్లను సందర్శించి, ప్రభుత్వ పనితీరును ప్రజలకు వివరించాయి.

శనివారం ఒక్కరోజే కూటమి నాయకులు, కార్యకర్తలు సుమారు 2.60 లక్షల కుటుంబాలను కలిశారు. ఎమ్మెల్యేలు, ఎమ్మెల్సీలు, నియోజకవర్గ ఇన్‌ఛార్జులు, అన్ని స్థాయిల నాయకులు ఈ కార్యక్రమంలో ఉత్సాహంగా పాల్గొంటున్నారు. ఇంటింటికీ వెళ్లి రైతు సంక్షేమం, మహిళా సాధికారత, యువతకు ఉపాధి, మౌలిక సదుపాయాల కల్పన వంటి అంశాల్లో ప్రభుత్వం సాధించిన ప్రగతిని, అమలు చేస్తున్న సంక్షేమ పథకాలను ప్రజలకు వివరిస్తున్నారు. ఈ కార్యక్రమానికి ప్రజల నుంచి విశేష స్పందన లభిస్తున్నట్లు టీడీపీ వర్గాలు తెలిపాయి.

ఈ కార్యక్రమ పురోగతిని తెలుగుదేశం పార్టీ వర్కింగ్ ప్రెసిడెంట్ నారా లోకేశ్ ఎప్పటికప్పుడు నియోజకవర్గాల వారీగా సమీక్షిస్తున్నారు. సాంకేతిక పరిజ్ఞానాన్ని వాడుతూ కార్యక్రమాన్ని మరింత సమర్థంగా నిర్వహిస్తున్నారు. భోగాపురం అంతర్జాతీయ విమానాశ్రయం ప్రారంభోత్సవంలో పలువురు ప్రజాప్రతినిధులు పాల్గొనడం, కొన్ని ప్రాంతాల్లో వర్షాలు కురిసినప్పటికీ అత్యధిక చోట్ల కూటమి శ్రేణులు ఉత్సాహంగా పాల్గొనడంపై లోకేశ్ హర్షం వ్యక్తం చేశారు. నాయకులు, కార్యకర్తలను ఆయన ప్రత్యేకంగా అభినందించారు. ఇదే స్ఫూర్తితో రానున్న రోజుల్లో ప్రభుత్వ విజయాలను ప్రజల్లోకి మరింత విస్తృతంగా తీసుకెళ్లాలని ఆయన పిలుపునిచ్చారు.